تلخيص لرحلتي من غياهب ظلم مصر و ظلامها الي نور الطموح و الأمل في الولايات المتحدة.


_ اتخرجت في طب إسكندرية سنة ٩٥، تقدير امتياز مرتبة شرف و ترتيبي ٤٢ علي دفعة قوامها ٧٤٠.
- كنت اتمني تخصصات جراحية خاصة العظام ، العيون، المسالك، و بعد ذلك اي تخصص تداخلي .
- دفعتنا كان فيها ٨٥ ابن أستاذ في الكلية ده غير ابن الأخ و بنت الاخت و الأولاد من الرضاعة و التبني .....الخ
- والدي الله يرحمه ما كانش أستاذ و لا كان بيشغل منصب "مهم"، كان راجل محترم و متعلم و شريف...فقط !
- نتيجة لترتيبي الحرج بالنسبة لكتير من ولاد الأساتذة كان لابد من تهديدي لتوجيهي الي تخصص بعيد عن مآربهم.
- افلح تهديدهم و إغراءهم في دفعي الي دخول قسم محاولة علاج الأورام (العلاج الإشعاعي و الكيميائي)، برغم كرهي الشديد لهذا التخصص و لكن ضغط العائلة و خوفهم علي من اساتذة الجامعة الأفاضل خللاني ارضخ .
- كنت اعلي ترتيب دخل القسم ده علي الإطلاق لان ما كانش بيدخله غير الفاشلين قبلي.
- من اول يوم في القسم ده و انا زاد كرهي له، ما كنتش بانام من الندم علي الانصياع للترهيب و الترغيب.
- في آخر سنة ٩٨ يعني كان بقالي سنة في القسم قررنا انا و زميلي محمد الجنيدي النائب دفعتي في نفس القسم اننا نمشي من مصر.
- بدانا سوا نذاكر من الصفر، و في يوليو ٢٠٠٠ نجحت في الجزء الثاني و بعد سنة بالضبط نجحت في الاول.
- سبقني محمد و سافر أمريكا يجرب حظه عشان هو أمريكي الجنسية و يسهل عليه السفر في اي وقت.
- في فبراير ٢٠٠١ اتعينت معيد في طب الازاريطة.
- بعد ما والدي توفاه الله في مارس ٢٠٠٢ قررت اسافر اعمل امتحان CSA، و ما ارجعش الا بعقد النيابة.
- وقتها كان عندي كريم و كان عمره ٤ سنوات فقط، كان فراق زوجتي و ابني اصعب من اي شيء واجهته في حياتي ......وقتها.
- بدأت اشتغل في محلات ملابس في نيويورك لحد ميعاد الامتحان ، و اول وظيفة لي كانت عامل أمن في محل ملابس اطفال.
- دخلت الامتحان في اغسطس و عرفت اني رسبت في سبتمبر و في نفس اليوم انهوا عملي في المحل عشان موسم المدارس انتهي و مش محتاجين عمالة .
- فضلت أدور علي عمل لمدة شهر و ربنا وفقني و لقيت شغل في محل احذية في منطقة خطيرة جدا في بروكلين.
كان لازم اشتغل لأَنِّي كنت قربت اموت من الجوع.

- بعد شهر من العمل بأجر بخس في محل الاحذية، ربنا كرمني بعمل احسن في محل مستلزمات البيت و غرف النوم و الحمامات في منطقة احسن.
- نجحت في CSA في يناير ٢٠٠٣، و ماكانش جالي اي فرصة interview في ال١٠٠٠ برنامج اللي انا قدمتلهم.
وقتها ماكنتش بأفكر في نسا او جراحة او اي شيء، انا كنت بأقدم علي كل شيء .
- سافرت بعد كده ١٠٠٠ ميل الي ولاية ميشجان للعمل مع دكتور مصري في مجال الأشعة العلاجية كمساعد باحث.
- خلت وظيفة في نيابات النساء و التوليد في نفس المدينة اللي كنت بأشتغل فيها.
- نصحني الأطباء المصريين في المدينة اني اجرب حظي و البس بدلتي و اروح اخبط علي الباب و اعرض نفسي عليهم، كده من غير ميعاد!!!!
- عملت بنصيحتهم و استقبلني مدير البرنامج بترحاب شديد، و بعد ما أتكلم معايا ساعة و كان معجب تماما بكلامي و سيرتي الذاتية و حماسي للعمل في أمريكا ، اعتذرلي بحجة ان أمريكا بتهاجم العراق في نفس اليوم و ان حيكون صعب اني اخذ التاشيرة من السفارة.
- خرجت من مكتبه يائس بائس، و قررت اني ارجع مصر لكنه وعدني اني لو قدمت تاني في الموسم التالي حايبعتلي مقابلة تانية.!!!!!
- رجعت مصر اجر اذيال الخيبة و لكن الرجل اوفي بوعده و بعتلي مقابلة فعلا و كانت دي هي المقابلة الوحيدة لي في أمريكا كلها !!!!
- سافرت و تركت زوجتي حامل في نص رمضان ٢٠٠٣.
- ربنا وفقني جدا في المقابلة و لكن ماعرضوش علي اي حاجة و قالولي لازم تستني نتيجة الماتش.
- رجعت مصر و شوفت بنتي الوليدة هنا، و استبشرت بيها خير و كانت علي رجلي و انا باكشف عن النتيجة و عرفت اني مقبول في الماتش.
ده كان تاني اسعد يوم في حياتي....
- بعد سنتين من التدريب في البرنامج الصغير في ميشجان حسّيت ان طموحي اكبر من كده و رجعت ابحث عن برنامج اكبر أتمرن فيه احسن ، فكانت مكافأة ربنا سبحانه و تعالي ان فتح لي باب واحدة من اكبر و أشهر جامعات العالم و هي جامعة بنسيلفانيا .
ده كان اسعد يوم في حياتي.......
- تخرجت من النيابة من برنامج جامعة بنسيلفانيا في سنة ٢٠٠٩.
-حصلت علي اجازة البورد الامريكي لجراحي النساء و التوليد سنة ٢٠١١ .

لا شيء في الدنيا يمكنه التفوق علي إرادة الانسان طالما كان معه توفيق من الله.

فرصة المصريين في نيابة النسا :


١) يجب يا شباب ان تعرفوا اولا ان العالم اجمع يعلم مدي ضعف التعليم و التدريب الطبي في مصر.
 

٢) عدد برامج تدريب النساء و التوليد ٢٥١ برنامج مما يطرح حوالي ١٢٠٠ وظيفة طبيب مقيم أمراض نساء سنويا.
في سنة ٢٠١١ تم طرح ١٢٠٥ وظيفة خلي منها ٨ لم يشغل
في سنة ٢٠١٢ تم طرح ١٢٤٠ وظيفة لم يشغل منها ١٧
في سنة ٢٠١٣ تم طرح ١٢٥٩ وظيفة لم يشغل منها ١١
في سنة ٢٠١٤ تم طرح ١٢٤٢ وظيفة لم يشغل منها ٨ فقط
اي انها نيابة عليها تنافس كبير من جانب الطلبة الأمريكان و غير الأمريكان .

 

٣) التدريب في هذة البرامج لا يقل و ربما يزيد عن ٤ سنوات، و هذا ما حدث معي شخصيا فقد كانت مدة نيابتي ٥ سنوات.
 

٤) كيف تجعل من نفسك أهل للمنافسة؟
- مجموع عالي جدا في امتحانات المعادلة حتي تلفت الأنظار . بمعني ان يكون المجموع اعلي من ٩٠.
- بحث علمي او اكثر في مجلة او منشور عالمي.
- إتقان اللغة الانجليزية.
- تكون علي استعداد تام للعمل في أمريكا لمدة طالت ام قصرت في مجال البحث العلمي في المعمل و ياحبذا لو كان ذلك في جامعة من الجامعات ذات الصيت.
- العمل التطوعي حتي في مصر له مردود كبير في الخارج ، فمثلا، يمكنك ان تذهب الي الواحات و تعمل هناك لمدة أسبوع تخدم فيها المجتمع هناك ثم تضع ذلك العمل في أوراقك مما يرتقي كثيرا بسيرتك الذاتية.
- اي خبرة في مجال النساء و التوليد لها فائدة في السيرة الذاتية و لكن كلما طالت مدة الخبرة في المجال خارج أمريكا كلما قل بريقك علي الورق امام لجنة الاختيار.
عندما كنت عضوا في لجنة اختيار المتقدمين في جامعة بنسلفانيا كنت استبعد ذوي الخبرة الطويلة التي تزيد عن ٧ سنوات و ذلك لصعوبة تدريبهم.

أنصحكم بالاتي:
----------------
١) لابد من درجات عالية في USMLE .
٢) الخبرة المصرية لا تساوي كثيرا و درجات USMLE اهم بكثير فلا تضيعوا وقتكم في ماجستير او دكتوراه او كلام فارغ من هذا القبيل.
٣) عندما تنتوي الالتحاق بنيابات النساء، يجب عليك ترك مصر دون ان تنظر خلفك و انت مسافر لتأدية امتحان CS. بعدما تفرغ منه التحق باي مستشفي و لو حتي في المعمل كي تبني خبرة علي الارض الامريكية .
٤) لا تستنكف ابدا من لقب observer او طبيب متفرج، اذا كان اي برنامج يرعي observer ships فلابد من الالتصاق به حتي يراك النواب و يتعاملون معك لربما يرتاحون لك و يفضلوك عن غيرك في وقت التقديم.

وفقكم الله احبتي

المصدر : جروب نصائح وارشادات للاطباء الراغبين فى السفر للخارج

Dr. Mohamed El Nemr

Attending physician

at Grand Lake Ob/Gyn

  • Facebook Social Icon
  • YouTube Social  Icon
  • doctoon.insta

© Copyright 2020 by DocToon