• Facebook Social Icon
  • YouTube Social  Icon
  • doctoon.insta

© Copyright 2020 by DocToon

معلومات سريعة عن متطلبات ممارسة الطب في ألمانيا

December 17, 2018

 

 

«معلومات سريعة للأطباء»

 

- اللغة :

المستوي المطلوب حاليا B2 وده ممكن توصله خلال 8-12 شهر دراسة مكثفة مع تفرغ. يُفضل يكون كورس برايفت مع حد عنده خبرة بنظام الإمتحان ثم تمتحن في معهد جوتة. طبعا في ناس كتير بتتعلم تعليم ذاتي.. جروب "تعلم الألمانية مجاناً" كنز بمعني كلمة.. عليه كل ما يخص تعلم اللغة من الألف للياء!

 

- الحساب البنكي💰:

الحساب المطلوب بيكون حسب مدة الفيزا. بمتوسط 700 يورو لكل شهر( حسب معلوماتي)... الفلوس دي بتصرف منها لحد ما تلاقي شغل، بحيث يضمنوا أنك مش هتيجي هنا تقولهم " ادوني"! ..لما بتوصل هنا بتفعل الحساب وبيكون ليك مبلغ محدد بتاخده شهريا..

 

-طلب الفيزا والورقيات المطلوبة :

دول محتاجين موضوع تاني مستقل! يأتي لاحقاً ان شاء الله..

 

*بعد ما توصل ألمانيا فيه إمتحانين مطلوبين*

 

- إمتحان اللغة الطبية 📝:

ده امتحان بتنظمه نقابة أطباء كل ولاية...معاد الإمتحان بيكون خلال 3-6 شهور من تقديم أوراقك...فيه كتب مشهورة للتحضير زي كتاب (Deutsch für Ärztinnen und Ärzte) مع تحضير الحالات المشهورة اللي بتتكرر ...

نظام الامتحان بيختلف بشكل بسيط من ولاية للتانية (ألمانيا عبارة عن 16 ولاية، كل ولاية ليها نظامها وقوانينها اللي بتتشابه في نقط وبتختلف في نقط)، لكن في المجمل بيكون عبارة عن إنك تاخد قصة مرضية من عيان وتكتبها وتناقشها مع أحد الممتحنين وممكن أسئلة في مصطلحات طبية. التقييم في الامتحان ده بيكون في المقام الأول تقييم لغوي، يعني يتأكدوا إنك فهمت العيان والعيان فهمك، مع بعض الأسئلة الطبية...

الامتحان ده ممكن تعيده عدد لا نهائي من المرات..... بعد الامتحان ده بتاخد تصريح مزاولة مهنة مؤقت (بيروفس ايرلاوبنسBerufserlaunbis) تشتغل بيه وده صالح لمدة سنتين .. خلال السنتين تعمل الإمتحان التاني وهو إمتحان المعادلة.

 

-إمتحان المعادلة 🎓:

الامتحان بيكون في المتوسط خلال 9-18 شهر من تقديم الطلب حسب الولاية... الإمتحان ده ليك تدخلة 3 مرات بس، بعد كده خلاص مينفعش تشتغل في ألمانيا..! برده بيختلف في صعوبته من ولاية للتانية.. لكن غالبا بيكون 3 ممتحنين، باطنة وجراحة وتخصص تالت تخدير أو عظام أو اطفال..الخ
الامتحان محتاج تحضير كويس .... أشهر الكتب للتحضير 150 Fälle Innere Medizin, Chirurgie بالاضافة لموقع طبي إسمه Amboss...معظم الولايات بيكون فيها " بروتوكولات" يعني أسئلة الإمتحانات السابقة والموضوعات اللي بيحبها الممتحنين ( إذا كانوا معروفين،، فيه ولايات بتبعتلك أسماء الممتحنين وفيه ولايات لا).

التقييم في الإمتحان ده بيكون تقييم معلوماتك الطبية في المقام الأول ... بيجيلك مريض تاخد منه قصة مرضية كاملة وتفحصه فحص كامل وتسجل كل اللي لقيته واللي عملته ( جواب خروج مريض).... الألمان بيحبوا التسجيل والاوراق زي عنيهم .. ثم مناقشة اللجنة في الحالة وتشخيصها وعلاجها...الخ ،ثم أسئلة طبية عامة حسب تخصصات اللجنة الممتحنة.. مع التركيز علي حالات الطوارئ والأمراض الشائعة..!
بعد الإمتحان ده بتاخد تصريح مزوالة المهنة الدائم(ابروباتسيون. Approbation ) !😉
بصراحة فرحة النجاح في الإمتحان ده لا تُوصف.. بتنسيك التعب اللي تعبته و بتحس فعلا إنك عديت من عنق الزجاجة اللي بيقولوا عليه!

 

** نظريا من حقك تقدم أوراقك لفحصها( Gutachten) ومعادلتها دون إمتحان معادلة.. عمليا ده تضييع وقت وفلوس ع الفاضي لانه بنسبة 99% هيقولوا لك ف الأخر شهاداتك غير معادلة ولازم تمتحن..

 

بعد التصريح الدايم تقدر بقي تعيد حساباتك وتشوف هتكمل في التخصص اللي إنت فيه ولا هتراسل ع تخصص تاني، لان ببساطة فرصك في سوق العمل زاااادت جدااا😎

 

دي معلومات سريعة ،لو فيه أسئلة تانية ياريت تكون في التعليقات !

 

Share on Facebook
Share on Twitter
Please reload

Featured Posts

مجموعة كورسات مجانية من الـ International Diabetes Federation

December 27, 2018

1/10
Please reload

Recent Posts
Please reload